برضه رح ننسى

المشكلة أنه نفس الناس التي تنادي الآن وين حكام العرب؟ اللهم أهلك حكام العرب, حكام العرب سبب كل الذل, حكامنا متآمرين متصهينين... الخ, هما نفسهم اللي لما سقطوا حكام العرب بعد ما طفح الكيل منهم قاموا يحكولك مؤامرة "صهيوأمريكانية غربية شرقية كونية مشوية مع 2 بيبسي و واحد شاي" لنزع حكامنا المقاومين أبطال الحروب و الشعوب, كيف زبطت معكم مش عارف!

و الناس اللي فعلا بدها تغيير و تبديل للأنظمة مفكرة الموضوع سهل و بمشي بمظاهرة و اعتصامين عالماشي و خلص خلصنا, بدون صبر و تضحية و معاناة يدفعها هو و أهل الخير, فحتى مريض السرطان لا يمكن علاجه الا بعملية و جلسات كيماوي بتهد جسمه هد و لكنه يستحمل و يصبر للتخلص من المرض الفتاك و لأنه يعرف أن البديل هو الموت, فما بالك بالأنظمة البائسة الخبيثة المتفشية في جسد الأمة من أقصاها لأقصاها؟

أكيد لتغييرها رح يكون في ثمن غالي جدا يندفع, بس احنا لا عمي اذا فيها قصف و طخ و بهدلة بدناش, خلينا هيك انسب و انعيط و انحط أكم من بوست عالفيسبوك بكفي.

يمكن لأنه بطبيعتنا عاطفيين و بننسى بسرعة, فنحن سرعان ما ننسى كل المآسي التي مرت فيها فلسطين و غزة تحديدا, نسينا حرب  2008 اللي سقط فيها شهداء و جرحى أضعاف الحرب الحالية, و نسينا أسطول الحرية اللي الدنيا انقلبت عليهم و قتلوا بدم بارد في وسط البحر و هم جايين ينقذونا من الجوع و الحصار و الموت البطيئ, نسينا حرب 2012 اللي اسرائيل مجددا قصفت القطاع كأنها بتتسلى و بدها جنودها يحللو راتبهم فقالت امشي نعمل شوية أكشن, نسينا القاضي الأردني زعيتر و كيف قتل على الجسر لأنه قال "الله أكبر", نسينا كيف حرق الشاب محمد أبو خضير و هو حي على يد أنجاس الأرض و غيرها مواقف كثيرة, و كل مرة بننفعل و بتكبس معنا على زعل و بنسب في الحكام و بنغير صورة الفيسبوك انتقاما, ولكن بعد مرور وقت على الموضوع سرعان ما نزهق و يلا نرجع نشوف شو في جديد عالأخبار و نتسلى و نضيع وقت, كما نسينا كل ما سبق سننسى قصة #حرب غزة 2014 و ترجع صور البروفايلات كالسابق و البوستات ترجع عن برشلونة و مدريد و أراب أيدول و توتا توتا خلصت الحدوتة.